Norðoya Sparikassi heldur fram sum høvuðsstuðul hjá Treysti

Týsdagin 12. mars skrivaðu Norðoya Sparikassi og Treysti undir stuðulsavtalu. Avtalan hevur við sær at Norðoya Sparikassi heldur fram sum høvuðsstuðul hjá ítróttarfelagnum Treysti komandi trý árini í 2019, 2020 og 2021.

Vit í Norðoya Sparikassa fegnast um avtaluna. Treysti er eitt sera virkið felag, og er við til at betra um bæði heilsu og samanhald í nærumhvørvinum. Hesum vil sparikassin fegin halda fram at stuðla.

FM í hálvmaraton heldur fram undir heitinum “NS hálvmaraton” og fer at hava start og mál við høvuðsdeildina hjá Norðoya Sparikassa. FM í hálvmaraton verður hildið í mai og er størsta einstaka tiltakið hjá Treysti. Eisini verður onnur árlig kapping fyriskipað.

Í Treysti fegnast tey eisni um avtaluna, sum m.a. ber í sær, at felagið kann halda fram at mennast og bøta um karmarnar hjá limunum. Limaskarin er fjølbroyttur og hevur ymsan tørv, og Treysti leggur dent á, at øll hava møguleika at íðka í felagnum.

Treysti leggur eisini stóran dent á at menna ungar íðkarar og vil halda fram at geva teimum so góðar umstøður, sum til ber, bæði til venjingar og kappingar her heima og uttanlands.